ORÐABANKI ÍSLENSKRAR MÁLSTÖÐVAR

Veðurorð, orða- og hugtakaskrá í veðurfræði og skyldum greinum. Íslenska, enska. 2002. Trausti Jónsson. (Aðeins til rafræn útgáfa.) Skráin er enn í vinnslu og notendur hennar eru vinsamlegast beðnir að senda málstöðinni athugasemdir sínar.

Vinsamlegast vitnið til skrárinnar á eftirfarandi hátt:

Trausti Jónsson 2002. Veðurorð [rafræn útgáfa]. Orðabanki Íslenskrar málstöðvar [http://herdubreid.rhi.hi.is:1026/wordbank/search]. Íslensk málstöð, Reykjavík

UM VEÐURORÐ

Til grundvallar Veðurorðum var lögð tæplega 500 orða skrá sem Páll Bergþórsson tók saman vegna útgáfu skólaorðabókar Arnar og Örlygs fyrir um tuttugu árum. Trausti Jónsson orðtók safn fræðibóka og bætti við listann. Mörg orð og hugtök reyndust eiga ágætar þýðingar í orðaskrám eðlisfræðinga, stærðfræðinga og stjörnufræðinga og voru þær notaðar þar sem við átti. Í fáeinum tilvikum reyndust þýðingar í stóru ensk-íslensku orðabókinni einnig fullnægjandi og fáeinar eru fengnar úr orðasafni Jóns Benjamínssonar um jarðfræði. Í mjög mörgum tilvikum fyrirfundust þýðingar hins vegar ekki eða þá að þær reyndust ófullnægjandi eða misvísandi. Því er reynt að stinga upp á þýðingum eða nýyrðum og má finna tillögur sem eiga við flest þau hugtök sem vantaði.

Því er ekki að neita að sumar nýþýðinganna eru hroðvirknislegar og varla fullnægjandi. Finnist betri orð koma þau smátt og smátt í stað hinna verri. Reikna má með að listinn verði mörg ár í þróun og að í hann muni bætast fleiri hugtök. Síðar verður grein betur á milli þýðinga og skýringa. Til stendur að bæta síðar við mun ítarlegri lista um þá vinda og veður sem eiga sérstök staðbundin nöfn víðs vegar um heim, aðeins fá slík orð eru nú í listanum.

Tölvupóstur til ritstjóra Veðurorða

7. apríl 2005. Ágústa Þorbergsdóttir